Ерөнхий сайд “Чингис” зочид буудалд болсон Засаглалын III форумыг нээж “Монгол Улс шилжилтийн үеийн буухиаг хөгжлийн буухиа болгох ёстой. Энэ боломж бидэнд байна. Ингэхийн тулд засаглалын болон үйлдвэрлэл, үйлчилгээний шинэ стандартыг хэвшүүлж, үнэт цаас, хөрөнгийн зах зээлийг хөгжүүлэх хэрэгтэй” гэв. Эрдэс баялаг, боловсрол, хөдөө аж ахуй, үйлдвэрлэл үйлчилгээ, аялал жуулчлал зэрэг бүх салбарыг хөгжүүлэх дотоод боломж, гадаад дэмжлэг байна. Ашигт малтмалын нөөц ихтэй улс орнуудын засаглал сайтай нь хөгжиж, муутай нь ядуурсан жишээ олон. Иймээс эдийн засгийн шинэчлэлийг хөгжлийн эдийн засгийн шинэчлэл болгохын тулд засаглалаа сайжруулж тогтвортой, ил тод, ойлгомжтой, тоглоомын дүрмээ тодорхой болгох хэрэгтэй. Төрийн өмчит МИАТ компанид үүссэн нөхцөл байдал нь тухайн байгууллагад засаглал муу байгаагийн тод жишээ. Бид чаддагаараа менежментийг нь сольж байгаа ч энэ нь шийдэл биш. Компанийн засаглал, соёл, ёс зүйг өөрчилсөн цагт ажил жинхэнэ стандартын дагуу явах учиртай гэж Ерөнхий сайд хэллээ. Ганц МИАТ ч биш төрийн өмчит бусад компанид засаглалын шинэ стандарт тогтоох, Төлөөлөн удирдах зөвлөлд нь иргэний нийгэм, мэргэжлийн холбоод, төрийн бус байгууллагын төлөөллийг оруулахыг Төрийн өмчийн хорооны даргад үүрэг болгосон. Төр өөрийн ачаанаасаа зарим боломжтойг нь шилжүүлэх ёстой. Ингэхдээ нэг компанид биш, нийгэмд хүлээн зөвшөөрөгдсөн, нэр хүндтэй, салбараа бүрэн төлөөлж чадах мэргэжлийн холбоод, төрийн бус байгууллагуудад шилжүүлэх ёстой. Өнөөдөр манайд мэргэжлийн холбоо маш их байна. Тэд хүчтэй, нэгдмэл болох учиртай гэж Ерөнхий сайд тэмдэглэлээ.
Үндэсний томоохон компаниуд хувьцаа гарган хөрөнгийн зах зээлд гарахын тулд ашиг, орлогоос гадна засаглалаа сайжруулах чиглэлээр бодит ажил хийх хэрэгтэй. Засгийн газар үндэсний компаниудаа дэмжих бодлого баримталж байна. Энэ удаагийн форумаас гаргах тодорхой ажил хэрэгч санал, зөвлөмжийн боломжтойг нь Засгийн газар төрийн бодлогод тусгах болно гэж Ерөнхий сайд хэллээ.
Засаглалын III форум нь монголын бизнес эрхлэгчид, шийдвэр гаргагчдад Дэлхийн банкнаас гаргасан Компанийн засаглалын стандарт хэрэгжилтийн үнэлгээний тайланг танилцуулах, компанийн засаглалд тулгарч байгаа эрх зүйн болон бусад асуудлаар санал солилцож, шинэчлэл хийх нэгдмэл байр суурьт хүрэх зорилготой аж.
No comments:
Post a Comment